من مدة أبي أنزل بوست عن تجربتي في مطعم بلانيت هوليوود المهبولة

و كانت زيارتي له قبل رمضان

لكن بسبب انشغالي ما قدرت أنشره

و اليوم أقدم لكم تقرير عن زيارتي للمطعم

بلانيت هوليوود من المطاعم الشهيرة حول العالم و هو ملك لمجموعة من نجوم هوليوود و كانت بداية انتشاره منتصف التسعينات في امريكا ثم انتشرت أفرعه حول العالم و كان أول فرع له بالوطن العربي في دبي في بداية الألفية

يقع المطعم في منطقة المطاعم في المهبولة في مجمع الصراحه ما ركزت على اسمه لكنه مجمع جديد و يضم عدة مطاعم و كافيهات من بينهم مطعم شيليز

وصلنا المطعم آنا و الأهل في يوم الزوارة اللي قررنا فيه ناكل بره و نغير شوي عن اكل البيت و كان المطعم شبه فاضي و ما عليه ضغط و خذنا راحتنا فيه

المكان واسع و شرح و ذكرني في اجواء مطاعم أمريكا

و كان واضح إنهم مجهزين لأجواء مباريات كاس العالم

الديكور مثل ما هو معروف عن بلانيت هوليوود عبارة عن قطع اكسسوارات و ازياء من افلام شهيرة

و طبعا ركن الشوبنق موجود لبيع منتجات المطعم من تيشيرتات و أكواب على شعار بلانيت هوليوود الكويت

وصل المنيو و كان مميز و عبارة عن اعلانات لأشهر مسرحيات برودواي الشهيرة مثل ويكد و جيرسي بويز و لايون كينج

فجأة حسيت نفسي في لندن أو نيويورك

و طبعا على الطاولة بتلقون أوراق مفارش للأكل عبارة عن صور أشهر نجوم هوليوود و اهما صغار و في مرحلة المراهقة و قعدنا نلعب آنا و الاهل و نأشر على صورة صورة و الشاطر اللي يعرف منو صاحب الصورة و اخذ من الضحك و الطنازه

وصلت المقبلات

و شوي شوي وصل الاكل و كان بعضه لذيذ و بعضه عادي

أكثر شي عجبني العصير و الهمبورجر وايد لذيذ

و هذي بعض الصور لديكورات المطعم و أحلى شي فيها لوحة ببصمات أيادي نجوم هوليوود

و كانت هذي زيارتي لبلانيت هوليوود رغم ان الكثير قالولي لا تروح له ما فيه زود لكن بالنسبة لي كان كسرة روتين و تغيير جو مع الاهل

تقييمي للمطعم 6 من 10

مطعم بلانت هوليوود Planet Hollywood